Nagpasaka na sang patong-patong nga reklamo ang negosyante kag kilala sa industriya sang sugal nga si Charlie ‘Atong’ Ang batok kanday alyas ‘Totoy’ kag alyas ‘Brown’ may kaangtanan sa mga ginpahayag nga alegasyon sang duha.
Sa Mandaluyong City Prosecutor’s Office, nag-abot si Atong Ang kaupod ang iya abogado nga si Atty. Lorna Capunan, dala ang complaint-affidavit batok sa mga nagpakilala nga testigo.
Nag-abot sila pasado alas-9 sang aga agud pormal nga isumiter ang reklamo, kasunod sang mga ginsiwalat kag akusasyon ni alyas ‘Totoy’ sang gab-i.
Gin-akusar ni Totoy si Charlie ‘Atong’ nga amo ang “mastermind” ukon ang yara sa likod sang pagkadula sang mga sabungero.
Gani, nagdesisyon ang kampo ni Atong Ang nga ipormal ang reklamo agud mag depensa batok sa tanan nga alegasyon.
Suno sa iya abogado nga si Atty. Lorna Capunan, ginpasaka nila ang mga reklamo nga:
Attempted Robbery with violence and intimidation, Grave Threat, Grave Coercion, Incriminating an Innocent Person, kag Slander.
Sa kabug-usan, lima ka kaso ang ginpasaka batok kay alyas ‘Totoy’ may kaangtanan sa seryoso nga mga akusasyon niya batok kay Atong Ang.
Dugang pa, ginpahayag sang ila kampo nga ila gin-file ang complaint-affidavit agud indi lang ang isa ka panig ang mabatian sang publiko.
Gusto nila nga may “transparency” kag patas nga pagtan-aw sa isyu bangud nabatyagan nila nga ang panig lang ni alyas ‘Totoy’ ang ginapamatian kag ginapaguwa sa publiko.
Bangod sini, nagapati ang kampo ni Atong Ang nga wala sang basehan, wala sang kredibilidad, kag indi matuod ang mga alegasyon ni alyas ‘Totoy’ batok sa ila.
Pagkatapos nga masumiter ang pormal nga reklamo, nagpatigayon man sang press conference ang kampo ni Atong Ang.
Didto, ginpabutyag ni Atong Ang ang iya kasubo kag kabudlayan nga dala sang mga alegasyon ni alyas ‘Totoy’ batok sa iya.
