Ginkumpirmar sang Department of Justice nga lakip na duha ka kilala nga personalidad sa imbestigasyon may kaangtanan sa pagkadula sang mga sabungero.
Gintumod sang ahensya ang negosyante kag kilala sa industriya sang sugal nga si Charlie ‘Atong’ Ang kag ang aktres nga si Gretchen Barretto bilang mga suspek sa kaso.
Sa interbyu sang Bombo Radyo kay Justice Secretary Jesus Crispin Remulla, ginpahayag niya nga ang nasambit nga mga indibidwal ang kabahin na sang mga gina imbestigaran sa pagkadula sang mga sabungero.
Ini ang ginsundan sang pagsiwalat ni Julie ‘Dondon’ Patidongan ukon kilala bilang alyas ‘Totoy’ nga ginatudlo si Atong Ang kag Gretchen Barretto nga may kahilabtanan sa insidente.
Apang ginpahayag man ni Justice Secretary Remulla nga ang proseso sang imbestigasyon sang DOJ padayon pa kag ila pa ginaberlipikar ang mga impormasyon nga nakuha.
Sa pihak sini, gilayon man nga ginpanginwala ni Charlie ‘Atong’ Ang ang mga alegasyon. Suno sa iya, indi sila kriminal kag wala siya sang labot sa kaso sang mga nadula nga sabungero.
Samtang, apisar sang pagpanginwala ni Atong Ang sa mga akusasyon ni alyas ‘Totoy’, ginpasiguro ni Secretary Remulla nga magapadayon gihapon ang imbestigasyon.
Ginpasiguro man niya nga indi maapektuhan ang ila imbestigasyon sa tunga sang magkalain-lain nga pahayag sang duha ka kampo.
