Patay ang isa ka miyembro sang Philippine National Police (PNP) matapos ginltuhang sang iya ugangan sa tunga sang mainit nga away nila sang iya asawa sa Purok Magic Rose, Barangay Poblacion, Presidente Quirino, gab-i sang Hunyo 25, 2025.
Ginkilala ang biktima nga si Bobby Vegafria Nanali, 37 anyos, kasado kag residente sang lugar.
Siya ang aktibo nga pulis kag may issued firearm nga Glock-17.
Suno sa report sang Presidente Quirino Municipal Police Station,banda alas 10:00 sang gab-i, sang matabo ang pagpangluthang.
Antes matabo ang pagpangluthang, nag-away suno pa si Nanali kag ang iya asawa sa sulod sang ila balay.
Sa tunga sang nasambit nga binaisay, gin agawan suno pa nila ang pusil nga ginapanag-iyahan ni Nanali.
Nakuha ini sang asawa kag ginhatag sa iya iloy nga si Ester Reyes Resurreccion.
Pagkatapos sang away, nagwa si Nanali kag nagkadto sa ila parking garage. Ginsundan suno pa ini sang iya asawa kag ugangan.
Nagpadayon sa garahe ang ila baisanay tubtob nga ginpusil siya sang iya ugangan sa likod.
Ang bala naglabay sa iya likod kag naggwa sa iya tiyan kag may pilas man ini sa likod sang iya ulo.
Gilayon siya gindangat ang nasambit nga pulis sa Tomboc-Salayog Hospital para sa medikal nga bulig.
Nakuha sa lugar ang Glock-17 nga pusil nga may serial number PNP 35657, nga amo ang official firearm sang biktima.
Ang mga ebidensya yara na sa kustodiya sang SOCO.
Ang gin-alegar nga suspek, si Ester Resurreccion, kag ang iya bata (asawa sang biktima) ang yara na sa kustodiya sang Presidente Quirino Police para sa nagakaigo nga imbestigasyon kag legal nga proseso.
