Nagapangayo sang bulig ang pamilya sang duha ka biktima nga sanday alyas Rey kag alyas Alvin, nga nasapwan nga patay sa isa ka liblib nga bahin sang Maguindanao, matapos madiskubrehan nga nadula ang pipila ka importante nga kabtangan nga dala nila antes ang insidente.
Suno kay Marilou Flores, asawa ni alyas Rey, nagdala sang ₱10,000 nga kwarta, isa ka cellphone, multicab, kag iban pa nga gamit ang mga biktima sang nagbiyahe sila pakadtu sa Maguindanao para sa negosyohanay.
Ginpahayag sang pamilya nga plano nila gamiton ang kwarta kag mga gamit sa pagpangabuhi, gani nagadugang pa ini sa kasakit sang ila pamilya nga nawadaan sang pangabuhi kag kabuhi sang ila hinigugma.
Isa man sa ginatamod nga palamangkutanon amo nga wala sang bisan isa ka identification card sang mga biktima sang nasapwan ang ila patay nga lawas, bisan pa nga ginkumpirmar nga kumpleto ini antes sila magbiyahe.
Bangud sa pagka dula sang mga gamit, isa na sa mga anggulo nga ginatan-aw subong sang mga opsiyal amo ang posibilidad sang pagpangawat nga motibo sa krimen.
Nagapanawagan ang pamilya nga kon may may impormasyon ang publiko parte sa mga nadula nga gamit, labi na ang multicab, nga magpaabot sang bulig agud ini mabalik kag mabuligan nga matultul ang mga responsable.
Sa karon, Padayon subong ang imbestigasyon sang kapulisan sa motibo kag mga suspek sa krimen.
