Isa naman ka trahedya ang nag-uyog sa India matapos mag-crash ang isa ka helicopter sa Himalayan state sang Uttarakhand sang aga sang Domingo, Hunyo 15, 2025.
Base sa report, natabo ang insidente mga alas-5:30 sang kaagahon sa area sang Gaurikund sa Rudraprayag district. Ang helicopter may sakay nga pito ka tawo anom ka pasahero nga mga deboto kag isa ka piloto. Tanan sila napatay sa trahedya, lakip ang isa ka duha ka tuig nga babayi nga bata.
Ginkumpirmar ni Uttarakhand Chief Minister Pushkar Singh Dhami ang insidente kag nagpahayag sang iya pagpakigbuylog sa kasubo sang mga naulila.
Gina-imbestigaran pa ang kabug-usan nga rason sang aksidente, pero ginapatihan nga ang rason amo ang malain nga panahon kag mababa nga visibility samtang ang helicopter nagabiyahe halin Kedarnath padulong Guptkashi, nga kabahin sang Char Dham pilgrimage route.
Ini nga trahedya natabo lang tatlo ka adlaw matapos ang isa pa ka mabaskog nga insidente sa India, kon sa diin isa ka eroplano sang Air India ang nag-crash sa Gujarat nga nagresulta sa kamatayon sang sobra 270 ka tawo.
