KORONADAL CITY – Isa na naman ka istorya sang pagpanikasog, handum, kag inspirasyon ang ginbuksan sang pagkab-ot ni Angelyn Labaria, isa ka Bachelor of Elementary Education (BEED) graduate, nga nakasulod sa Top 10 sa March 2025 Licensure Examination for Teachers (LET), nga may Rank 9 kag rating nga 92.80%.
Suno sa iya, sa eksklusib interbyu sang Bombo Radyo Koronadal, gintinguhaan ni niya nga mag-top sa board exam.
Ginpabutyag niya nga isa sa mga naghatag sang inspirasyon sa iya amo ang iya pamilya, nga nangin dako nga rason kon ngaa wala siya nag-untat sa iya handum.
Halin sang una, ginhandom ni Labaria nga mangin isa ka maestra.
May bug-os siya nga interes sa pagtudlo, ilabi na gid sa mga kabataan sa elementarya, isa ka rason nga naghatag sang direksyon sa iya kabuhi.
Nagpreparar siya sulod sang lima ka bulan para sa LET kag nagtutok sa disiplina. Ginplano niya ang adlaw-adlaw nga oras para sa pagtuon kag ginsiguro nga may focus siya sa iya mga leksyon.
Duha ka bulan antes ang exam, nakaatubang siya sang kabudlayan bangod sa kakulangan sa budget.
Suno sa iya, indi siya pirmi makatambong sa review, apang sa pihak sang iya absences, nagapadayon siya sa pagtuon sa ila balay kag wala siya nagpasayang sang oras.
Isa man sa ginpakigbahin ni Labaria amo ang iya study tips. Suno sa iya, gin-assess niya ang iya kaugalingon samtang nagatuon, kay bangud nagapati siya nga nagkalain-lain ang estilo sang pagtuon sang mga estudyante. Ginpangita niya ang epektibo nga paagi para sa iya kaugalingon kag ginpabakod ang iya motivation.
Isa sa mga pinakabudlay nga punto sang iya nangin journey amo sang isa ka semana antes sang exam, kun sa diin nadulaan siya sang gana magtuon bangud sang personal nga problema. Apang sang adlaw antes sang exam, nagpangamuyo siya kag ginpakamaayo ang tanan.
Sang adlaw sang exam, nabatyagan niya ang kakulba, papang ginpaningwa niya nga magpabilin nga kalmado. Ginpangibabawan niya ang kahadlok paagi sa pagtpati kag pagbalik-tan-aw sa rason kon ngaa niya ginpangabudlayan ang tanan—para sa Ginoo kag sa iya pamilya.
Subong, ginaselebrar ni Labaria kag sang bug-os nga siyudad ang iya kadalag-an kaupod ang iya pamilya kag mga mentors nga nangin kabahin sang iya pagpanikasog kag pagpanghikot.
Nagpaabot man si Labaria sa tanan nga wala man makapasa kag maga take pa lang sang exam nga magpadayon lang sa pagtuon, pagpanikasog, kag pagsalig sa kaugalingon nga indi suno pa pagkalimtan nga ang determinasyon kag disiplina bangud sini, posible makab-ot ang maskin ano man nga handum.
