KORONADAL CITY – Isa ka babayi nga tumandok sang Barangay San Jose, siyudad sang Koronadal ang nangin isa sa mga topnotchers sa bag-o lang nagtakop nga Licensure Examination for Teachers (LET) sang Marso 2025.
Ginkilala ang nasambit nga topnotcher nga si Angelyn Labaria, isa ka Bachelor of Elementary Education (BEED) Teacher kag amo graduate sang Ramon Magsaysay Memorial College – Marbel, nga nakakuha sang Rank 9 sa nasambit nga eksaminasyon, nga may rating nga 92.80%.
Ginpahayag sang iya mga propesor nga may “mixed emotions” sila sa nadangatan nga kadalag-an ni Labaria – nga isa ka buhi nga ehemplo sang paghandom, pagpangabudlay kag dedikasyon sa pag-eskwela.
Sa nasambit nga LET, base sa datos sang Professional Regulation Commission (PRC), may 55,029 ka passers gikan sa kabug-usan nga 97,035 nga examinees – katumbas sang 56.71% nga passing rate.
Si Labaria, subong isa na ka Licensed Professional Teacher (LPT), ang ginapanan-aw subong sang komunidad bilang inspirasyon sa mga kabataan nga nagapangandoy man mangin manunudlo.
Bug-os nga komunidad ang nakigbahin sang kalipay sa iya makabig nga milestone, kag ginalauman nga mas madamo pa nga mga estudyante ang iya maimpluwensyahan sa palaabuton.
