Magaatubang sang dako nga hangkat sa ang Gilas Pilipinas sa paabot nga FIBA Basketball World Cup 2027 Asian Qualifiers matapos nga malakip sila sa mabaskug nga Group A.
Upod sa grupo sang Gilas ang world number 7 nga Australia, world number 22 nga New Zealand, kag number 88 nga Guam. Ang Gilas, nga yara sa ika-34 nga pwesto sa world rankings, kinahanglan magpakita sang pwersa agud makasulod sa Top 3 sang grupo..
Magsugod ang group stage games sa Nobyembre subong nga tuig, samtang ang main tournament sang FIBA World Cup 2027 igahiwat sa Doha, Qatar.
Sa pormat sang double round-robin, home-and-away system nga may unom ka window, kinahanglan nga malab-ot sang Gilas ang top 3 sang grupo sa unang round agud makaabot sa ikaduha nga round sang qualifiers.
Ini nagakahulugan nga duha ka beses magaatubang ang Gilas kag Guam, nga dapat nila madaug agud mapadayon ang tsansa nila sa tournament.
Ang mga top 3 teams sa Group A igaupod sa tatlo ka qualifiers halin sa Group C nga ginabug-os sang Iran, Syria, kag Jordan.
Sa pihak nga bahin, ang Group B ginkomponer sang Japan, China, Korea, kag Chinese Taipei; samtang ang Group D naman may Lebanon, Saudi Arabia, India, kag ang host nation nga Qatar.
Ginalauman sang mga fans nga mapakita sang Gilas ang ila determinasyon kag kalibre sa magaabot nga kompetisyon.
