Nagpanawagan si Lanao del Sur Rep. Zia Alonto Adiong kay Bise Presidente Sara Duterte nga untaton na ang mga akusasyon nga wala sang basehan kag atubangon na lang ang isyu bahin sa confidential funds.
Suno kay Adiong, ang ginahimo subong sang Bise Presidente puro lang diversionary tactics—nagapanglabay sang mga isyu nga wala sang kamatuoran.
Klaro nga ginapalagyo ni VP Sara ang pagsabat sa matuod-tuod nga isyu, labi na gid sa ginahingadlan nga isyu sa confidential funds nga ginalakipan niya.
Ginpanindugan ni Adiong nga ang mga alegasyon batuk kay VP Sara naghalin sa findings sang Commission on Audit (COA) parte sa ginaduda-dudahan nga paggasto sang confidential funds halin sa Office of the Vice President kag Department of Education.
Suno sa report, ang amo nga pondo ginpahayag nga gin-allocate sa mga intelligence assets nga may mga makaduloda nga ngalan pareho kanday “Mary Grace Piattos,” “Kokoy Villamin,” “Xiaome Ocho,” kag “Jay Camote” .
Ginpaathag ni Adiong nga ang mga akusasyon nga ini indi political narrative kundi matuod-tuod nga findings halin mismo sa state auditors.
Gani, dapat untaton na ni VP Sara ang paglikaw kag pag-usmod sang isyu.
