Ginbuyagyag sang Department of Education (DepEd) nga kinahanglan itigayon ang pagtudlo sang literacy skills sa kabataan sa temprano nga edad, kasunod sang 2024 FLEMMS nga nagapakita nga sobra 18 milyon nga junior high school graduates ang functionally illiterate ukon may kabudlayan sa pag-intindi sang leksyon.
Suno kay DepEd Assistant Secretary Jerome Buenviaje, importante ang pagtutok sa literacy halin Kindergarten tubtob Grade 3 agud indi mabudlayan ang mga estudyante sa mas mataas nga grado.
Apang ginpunto man niya nga indi lang DepEd ang may responsabilidad, kundi apektado man sang malnutrisyon kag iban pa nga rason.
Gintukod na sang 2023 ang revised K-10 curriculum nga nagpanubo sang learning competencies kag naghatag-pokus sa literacy, numeracy, kag socio-emotional development.
Suno kay Education Secretary Sonny Angara, indi pag-itugot sang DepEd nga may mabilin sa pagbasa kag pag-intindi. Samtang, ginpahayag ni Senadora Loren Legarda nga ang datos sang FLEMMS nagapakita sang seryoso nga problema sa sistema sang edukasyon.
Sa mas istrikto nga standard sang FLEMMS, kinahanglan nga kabalo magbasa, magsulat, magkwenta, kag mag-intindi agud matawag nga functionally literate, rason sang pagdamo sang indi nakapasar.
Suno kay Legarda, delikado ini sa palaabuton sang pungsod.
