Mabudlay ang mangin sitwasyon sang mga mangunguma sa Mindanao kon matuman na ang plano sang gobyerno nga ibaligya ang bugas sa P20 pesos kada kilo.
Ini ang nangin pahayag ni Angelina Rimando – rice store owner sa Merkado Publiko sa interview sang bombo radyo Koronadal.
Suno kay Rimando, kon matuman ang plano nga ibaligya ang bugas sa Mindanao sa presyong P20 pesos kada kilo, dako gid ang posibilidad nga malugi ang mga mangunguma.
Ginalantaw sini nga indi lang ini isa ka simple nga isyu sang presyo kundi may mas lawig nga epekto ang nasambit nga programa.
Ginpunto ni Rimando nga ang mga mangunguma subong nagakinahanglan sang daku nga kapital sa pagpanguma bangud sa mahal nga presyo sang mga kinahanglanon pareho sang abono, chemical, binhi, kag iban pa nga gamit.
Kon indi man lang buligan sang gobyerno sa pagpanubo sang presyo sang mga ini, indi mabalanse ang barato nga bugas kag ang gasto sang mangunguma.
Mangin madasig ang pagpanaog sang presyo sang bugas apang ang mga gamit sa pagpa-nguma wala man mahatagan solusyon, dako gid ang posibilidad nga indi na makabawi ang mga mangunguma sa ila mga gasto.
Suno pa sa iya, posible man nga magbarato ang presyo sang humay sa merkado, kag ini ang magabatsyagan gid sang mga mangunguma nga nagapanikasog sa pagpangabuhi.
Bangod sini, ginapanawagan man niya nga kon padayon gid nga igapatuman ang nasambit nga programa, dapat ipantay man sang gobyerno ang pagpanubo sang presyo sang mga kinahanglanon sa uma
Lakip na diri ang subsidyo sa abono, chemical, kag iba pa nga agricultural inputs.
Kon may bulig man nga gina-target ang gobyerno para sa pumuluyo pinaagi sa barato nga bugas, dapat indi man kalimtan ang pangabudlay kag kontribusyon sang mga mangunguma.
