Ginkalipay sang YBL company ang pagkaaresto sang mga awtoridad sa suspek sa pagbomba sang isa ka unit sang Yellow Bus Line (YBL) sa tuig 2021, matapos ang apat ka tuig nga pagpangita kag pagmonitor.
Gindakop si Tasludin Kuda Saligan, ang ginkilala nga suspek, sa Barangay Badak, General Salipada K. Pendatun, Maguindanao del Sur.
Suno sa Philippine National Police (PNP), si Saligan ang responsable sa pagpamomba sa YBL bus sa Barangay Sibsib, Tulunan, Cotabato sang Enero 27, 2021, sa tunga sang hapon.
Sa insidente, napatay ang isa ka tindero sang prutas, samtang apat ang pilason kag tatlo pa ang apektado sang trauma.
Ginkumpirma ni Brig. Gen. Romeo Juan Macapaz, direktor sang Police Regional Office-Bangsamoro Autonomous Region (PRO-BAR), nga nadakpan si Saligan paagi sa bulig sang PRO-BAR, CIDG, kag nagkalain-lain nga operatiba sa Barangay Badak.
Si Saligan ang ginkilala nga miyembro sang duha ka terorista nga grupo, ang Dawlah Islamiya kag Al-Khobar, nga ginakabig responsable sa serye sang mga bomba sa Central Mindanao halin pa sang 2014.
Suno sa mga local executives sa Maguindanao del Sur, si Saligan may koneksyon sa mga grupo nga nagahimo sang mga terorista nga aktibidad sa rehiyon.
Ginakabig siya nga isa sa mga lider sang operasyon nga nagahulog sang kadaut sa seguridad sang Mindanao.
Ang Cotabato Provincial Government ginpaathag nga ang pagpamomba sang YBL bus sa Tulunan nga nagresulta sa kamatayon sang isa ka tawo kag pagkasamad sang madamo, isa ka brutal kag barbaric nga akto.
Padayon ang imbestigasyon sang mga otoridad para sa posible nga koneksyon sang suspek sa mas daku nga grupo ukon organisasyon nga nagapadayon sang mga teroristang aktibidad sa rehiyon.
Ang suspek maga-atubang sa mga kaso nga multiple murder, multiple frustrated murder, robbery, kag extortion sa nagkalain-lain nga mga korte sa Central Mindanao.
