May yara na sang lead ang mga awtoridad sa pagpangluthang-patay sa isa ka Indian National nga si Manpreet Singh, sang nasapwan ang iya patay nga lawas sa Purok Maligaya, Barangay San Isidro, Koronadal City, sang Abril 27, 2025, alas 12:45 sang kaagahon.
Ginkilala ang biktima nga si Manpreet Singh, 39 anyos, residente sang Purok Masagana 2, Barangay Santo Niño, Koronadal City.
Suno kay Hon. Mark Aguirre, Barangay Captain sang San Isidro, nakaangkon si Singh sang igo nga mga bala sa nagkalain-lain nga parte sang iya lawas, ilabi na sa likod, nga nangin rason sang iya kamatayon.
Sang nadawat sang Koronadal City PNP ang tawag gikan sa BPAT sang Barangay San Isidro, ginkumpirmar nila ang insidente kag ang patay nga lawas ni Singh sa lugar.
Narekober ang tatlo ka basyo sang bala kag ang motor nga Honda Click sang biktima sa crime scene.
Sa karon, padayon nga ginahimo ang imbestigasyon sang kapulisan agud mahibaluan ang motibo sang pagpangluthang.
Ginsugod na man nila ang pagkuha sang mga CCTV footages gikan sa Barangay Hall, nga amo ang ginapakita nga mga suspek sa kaso. Ang mga CCTV recordings amo ang ginamonitor kag ginagamit sa pagpadayon sang imbestigasyon.
Ang mga awtoridad nagahimo sang mas lawig nga imbestigasyon para sa pagklaro sang mga detalye kag veracidad sang insidente
