Nagpaabot sang madalom nga pagpasalamat si Fr. Angel Buenavides, Vicar General of Diocese of Marbel, sa nangin kabuhi kag pagpapnguna ni Pope Francis matapos ini nagtaliwan.
Suno kay Fr. Angel, bisan masubo ang balita, mas naglabaw ang iya pagpasalamat sa Santo Papa bangud sang madamo nga natandog kag nabag-o ang kabuhi pinaagi sa mga pagtudlo, kaayo, kabuot kag paghigugma ni Pope Francis.
Masakit man suno pa batunon ang iya pagtaliwan, apang mas daku ang iya pagpasalamat. Ang iya kabuhi nangin kasanag sa madamo, kag isa ka dakô nga regalo sa Simbahan.
Ginpabutyag niya nga ang pinaka-daku nga ipanubli ni Pope Francis amo ang iya pagka-simple—isa ka kinaandan nga, suno sa iya, nagapakita sang kabuhi mismo ni Hesus. Ang iya pagka-mapisan, lapit nga tagipusuon sa mga imol, kag pagkahiliusa sa tanan — amo suno pa ang nagahatag sang buhi nga ehemplo sang pagka-Kristiyano.
Ginpanawagan man niya nga mangin hamdong kag inspirasyon ini sa tanan nga lider sang Simbahan, ilabi na sa mga nagapanguna subong, agud sundon ang ehemplo ni Pope Francis kag magpangabuhi nga may pag-alagad.
Samtang nagapadayon ang pagpangamuyo sang mga Katoliko sa bug-os nga kalibutan, ginpanumdum ni Fr. Angel nga ang kabuhi ni Pope Francis mangin giya sa pagpadayon sang misyon sang simbahan sa pagpalapnag sang gugma, kaangot, kag pagtuo.
