Ginpangabay liwat sang Malakanyang nga magpauli na sa pungsod si anay Presidential Spokesperson Harry Roque nga subong ara sa The Hague, Netherlands.
Sa Press Briefing sa Palasyo, ginpahayag ni Palace Press Officer USec. Claire Castro, nga daw nagapangayo na sang bulig si Roque agud lang mapamatud-an ang iya mga akusasyon nga wala sang basihan batok kay President Ferdinand Marcos Jr.
Ang reaksyon ni Castro ang kasunod sa isa pa ka bag-o nga ginpahayag ni Roque nga nagagamit sang iligal nga droga ang Presidente.
Suno kay Castro nga sa mga ginahambal ni Roque subong, mahimo na siya matawag nga isa ka peddler sang fake news.
Ginpahayag man ni Castro nga si Roque ang amo ang yara sa likod sang “polvoron video” nga gina-konekta kay President Marcos.
Ini base sa pahayag sang vlogger nga si Pebbles Cunanan sa ginpatigayon nga hearing sang Tricommittee.
