Ginpasiguro sang Tsina nga mahatag ang proteksyon kag katungod sang tatlo ka Pilipino nga gindakop matapos sila akusaran sang ginapatihan nga pang-eespiya.
Suno kay Chinese Ambassador sa Pilipinas nga si Huang Xilian, ginatrabaho na ini sang Philippine Consular Office sa Tsina.
Ginpahayag man niya nga may koordinasyon na ang consular office sang Pilipinas kag ang mga Chinese authorities sa tanan nga isyu nga may kaangtanan sa tatlo ka Pilipino.
Amo ini ang sabat sang opisyal sang Tsina sang pamangkuton kon tugtan bala sang Tsina nga mabisita sang ila malapit nga pamilya ang mga nakakulong nga Pilipino.
Sa bahin naman sang Pilipinas, una na ginpahayag sang Department of Foreign Affairs (DFA) nga nagahatag na sila sang tanan nga kinahanglanon nga bulig, lakip na ang legal nga suporta para sa tatlo ka Pilipino.
Antes sini, nanindugan ang pila ka opisyal sang Pilipinas nga indi espiya ang tatlo ka Pilipino. Ginpahayag sang National Security Council nga mga ordinaryo lang nga Pilipino ini nga wala sang military training.
Posible nga isa ini ka pamaagi sang pagpangbato sang Tsina kontra sa Pilipinas bangud sang serye sang lehitimo nga pag-aresto sa mga Chinese nga nalakip sa ilegal nga aktibidad sang Philippine Offshore Gaming Operators (POGO) sa nagligad nga mga bulan.
