Hugot nga Ginpanalip-dan kag makapila ka beses nga ginpaandaman pinaagi sa radio challenge sang eroplano sang Philippine Coast Guard (PCG) nga Islander ang nasapwan nga Chinese research vessel nga “ZHONG SHAN DA XUE” sa distansya nga 78.21 nautical miles sa amihanan-kasadpan sang Itbayat, Batanes sang alas-8:00 sang aga, Martes, Abril 15.
Sa isa ka pahayag, ginsiling ni PCG spokesperson para sa West Philippine Sea nga si Commodore Jay Tarriela nga gin-deploy ni PCG Commandant Admiral Ronnie Gil Gavan ang PCG Islander 4177 sa baybayon sang Batanes agud bantayan ang amo nga Chinese research vessel.
Gintinguhaan sang mga sakop sang PCG Islander nga magpadala sang radio communication sa barko sang China sa madamo nga higayon, apang wala sila sang nabaton nga sabat.
Ginpasangkad man sang mga piloto sang PCG sa ila radio challenge sa Chinese research vessel nga wala ini sang otoridad nga magpatigayon sang marine scientific research sulod sa exclusive economic zone (EEZ) sang Pilipinas.
Ginpa-athag man nila nga ang mga ginahimo sang barko sang China isa ka klaro nga paglapas sa United Nations Convention on the Law of the Sea (UNCLOS) kag Philippine Maritime Zones Act
