Napasakaan na sang kaso kriminal ang mga ginatudlo nga may kahilabtanan sa pagpang-ambush patay kay Bai Maceda Lidasan, ang Municipal Election Officer sang Datu Odin Sinsuat, Maguindanao del Norte, kag sa iya bana nga si Datu Jojo Abo.
Madumduman nga nagluntad ang pagpang-ambush patay sang Marso 26, 2025 sa Barangay Makir sa amo nga banwa.
Ginkilala ang mga suspek nga sanday Gina Bano, punong-guro sang Sarilikha Elementary School sa Semba, Datu Odin Sinsuat, kag ang iya bana nga si Commander Amin Salik, nga ginatudlo nga Campaign Manager sang United Bangsamoro Justice Party (UBJP) sa amo man nga munisipalidad.
Bisan pa nga napasakaan na sang kaso, hugot nga nagpanawagan ang mga himata sang mga biktima sa mga ahensya sang gobyerno pareho sang COMELEC, Department of Justice (DOJ), kag Philippine National Police (PNP) nga siguruhon nga mangin patas, masanag, kag makatarunganon ang imbestigasyon agud makab-ot ang hustisya para sa ila mga pinalangga sa kabuhi.
