KORONADAL CITY – Tigayon nga ginbawian sang kabuhi ang isa ka babaye nga balot vendor matapos mabungguan sang kotse samtang papuli na pasado ala-una sang kaagahon, Sabado, Disyembre 7, 2024 sa Alunan Avenue, atubangan lamang sang SPDA sakip sang Barangay Zone IV, siyudad sang Koronadal.
Ginkilala ang napatay nga si Jenny Pabillona Asarcon, 52-anyos, residente sang Purok Nursery, Barangay Sta. Cruz, Koronadal City.
Naguwa sa imbestigasyon sang kapulisan nga samtang ginatulod ni Asarcon ang iya nga bisikleta nga ginagamit sa pagbaligya sang balot sa higad sang dalan, hinali ini nga ginbungguan sang isa ka puti nga kotse nga wala sang suga kag madasig ang dalagan.
Nagikan sa roundball area ang salakyan kag padulong sa banwa sang Banga sang magluntad ang aksidente.
Nadala pa sa hospital ang biktima apang gindeklarar ini nga dead on arrival na sang attending physician.
Matapos ang hitabo, boluntaryo naman nga nagsungka sa kapulisan anng drayber sang salakyan.
Nahibaluan nga 23-anyos ang driver sang salakyan nga residente sang Banga, South Cotabato nga papuli na sang magluntad ang aksidente.
