KORONADAL CITY – Ginpasiguro sang pamunuan sang Police Regional Office (PRO) -12 nga mangin luwas sang tanan kag mangin maayo sang seguridad subong nga Nobyembre 1 sang Todos Los Santos kag buwas Nobyembre 2, Adlaw sang mga patay.
Ini ang nangin pahayag ni PRO-12 Regional Director PBGeneral James E. Gulmatico.
Suno kay PBGeneral Gulmatico, ang mga pulis ang ginpalapta sa nagkalain-lain nga pampubliko kag pribado nga mga sementeryo kag Columbaria agud masiguro ang ikaayo kag kaluwasan sang publiko nga nagpadulong sa pagbisita sa pantyon sang ila mga pinalangga sa kabuhi nga nagtaliwan na.
Kadungan sini, ginpahayag man sang opisyal ang mga ginadumilian sa pagdala sa mga sementeryo ilabi na ang mga baraha, pangsugal, makahulubog nga ilimnon,mga patalom ukon anu man nga sahi sang armas-luthang.
Dugang pa sini, nagbutang man sila sang “police assistance desk” sa mga sementeryo agud mangin madali para sa publiko ang pagpangayu sang bulig sa tion sang emerhensiya.
Samtanag, target sang kapulisan ang “zero crime rate” subong nga UNDAS.
Gani, nagapanawagan ini sa tanan nga magkooperar sa mga otoridad agud nga masiguro ang kaluwasan sang tanan.
