Halos kalansay na nga nasapwan ang isa ka bangkay nga nagalutaw-lutaw sa baybayon nga sakop sang Barangay Kidama, Matanog, Maguindanao del Norte.
Indi na makilala ang nasambit nga bangkay nga nasapwan sang mga residente apang dako ang posibilidad nga babaye ini.
Ginapatihan sang mga otoridad nga pila ka semana na ini nga napatay kag subong lamang nasapwan.
Apang, indi pa matumod sa karon kun ini ang ginhaboy lamang ukon napadpad sa nasambit nga bahin sang baybayon.
Una diri, isa ka lalaki man nga bangkay ang una nga nasapwan nga nagalutaw-lutaw sa baybayon nga sakop sang Parang, Maguindanao del Norte.
Sa karon, wala pa nakilala ang mga ini gani nagapanawagan ang mga otoridad sa mga nadulaan sang himata nga magpadulong lamang sa ila nga talatapan agud nga ma-identify kun ila pamilya ang nasapwan nga mga bangkay.
