KORONADAL CITY – Apektado sang landslide ang tatlo ka Sitio sa Barangay Margues, Esperanza, Sultan Kudarat bangud sa sunod-sunod nga pagbubo sang mabaskog nga ulan.
Lakip sa mga apektado nga sitio amo ang Sitio Ugis, Sitio Sanghal, kag Sitio Kanalan.
Sa interview sang Bombo Radyo Koronadal kay Emerlinda Carbon, Punong Barangay sang Barangay Margues, may mga parte nga indi na masudlan bangod sa wala untat nga pag-ulan.
Apang, ang lugar sa Sitio Sanghal ginapanag-iyahan sang isa ka private company amo wala sang mga pumuluyo.
Dugang pa ni Carbon, indi dayon malab-ot ang Sitio Sanghal bangod ini isa ka remote area nga lugar kag mabudlay ang pagsaka, labi na kay wala signal, kuryente, kag malayo pa ini sa banwa sang Esperanza.
Sa karo, kabayo lang ang makasulod sa lugar nga ginluntaran sang landslide, apang mabudlay para sa tawo kay hasta sa hawak ang kataason sang putik.
Wala man sang ginreport nga pilason ukon nadulaan sang kabuhi sa mga apektado nga sitio, kag padayon ang koordinasyon sang mga opisyal sang Barangay Margues sa mga residente sa nasambit nga mga sitio.
