KORONADAL CITY – Nagahilibion ang iloy sang 9-anyos nga bata nga nalumos sa bahin sang Sitio Villa Ellaga, Brgy. Colungulo, Surallah, South Cotabato, Biyernes sang hapon, Oktubre 11,2024.
Sa eksklusibo nga interview sang Bombo Radyo Koronadal kay Mylene Pensoy, ginpahayag sini nga wala gid sila nakadipara nga magapauli ang ila nga mga bata sa ila nga balay bangod sa kabaskog sang tubig sa suba.
Suno kay Mylene, ginpungan man ang iya bata sang iya nga pakaisa kag tiya nga indi nalang anay magpuli sa ila balay kay bangod sa kabaskog sang hangin kag ulan, pero bangod may ginpanghatag nga libre nga raincoat ang eskwelahan sa mga studyante kag sa tuman nga kalipay sang bata gingamit niya ini kag nagpauli.
Dugang pa ni Mylene, tuman ang pagpangilat kag yara lamang man sila sa balay kaupod ang iya nga bana, kun diin ginhambalan man sini ang iya bana nga sugaton na kuntani ang ila mga bata.
Apang, nag-abot ang ila 7-anyos nga bata nga lalaki nga basa kag nagahilibion sa pagsugid nga gin-anod sang baha sa suba ang magulang sini.
Dugang pa sang iloy wala sila nag-expektar nga dako ang tubig sa suba kay sang wala nagainulan wala gid sang tubig ang nasambit nga suba.
Ginpangita pa ang bata sang ini ang gin-anod apang pagkabuwas na ini nakit-an nga wala na sang kabuhi.
