Ginmandu na ni Presidente Ferdinand Marcos Jr. subong nga adlaw, October 10, ang evacuation sang mga Pilipino sa Lebanon sa bisan ano nga pamaagi bilang pagpanghanda sang Philippine government pananglitan nga maglala pa ang tensyon sa tunga sang Israeli Defense Force kag militant group nga Hezbollah.
Naglunsyar si Marcos Jr. sang “urgent” virtual conference kaupod ang pila sini ka mga Cabinet secretaries agud nga istoryahan ang sitwasyon sa Middle East, samtang nga yara sia sa Association of Southeast Asian Nations (ASEAN) Summit.
Suno kay Marcos, dapat nga i-evacuate ang mga Pinoy sa Lebanon paagi sa dagat ukon sa kahawaan.
Pahayag pa sang presidente, kinahanglan pa nila nga matumod kon sa diin paagyon ang mga Pinoy bangud nga dapat pa nga bantayan ang sitwasyon.
Ginmanduan ni Marcos ang iya mga myembro sang gabinete nga obrahon ang tanan nga preparasyon kaangay sang pagkuha sang barko malapit sa Beirut nga pagasakyan sang mga Pinoy nga yara sa nasambit nga pungsod.
Ang direktiba sang presidente ang kasunod sang pila na ka adlaw nga paglunsyar sang Israeli warplanes sang 30 ka mga pag-atake sa southern part sang Lebanese capital.
As of October 8, nakabaton na ang Philippine Embassy sa Beirut sang masobra 1,700 ka mga applications para sa repatriation, sa diin masobra 500 na diri ang repatriated kag masobra 170 ang handa na para sa pagpauli suno sa Presidential Communications Office (PCO).
Pahayag ni Defense Secretary Gilberto Teodoro, handa sila nga mag-repatriate sang mga Pinoy sa ano man nga oras kag ginahulat lang ang diplomatic clearances sang mga expatriates nga ginaproseso sa Beirut.
