Kun sa Pilipinas, negatibo ang panulukan naton sa mga tawo nga nadula sa ila husto nga paminsaron kag kun kaisa, ginapakanubo kag ginadiskriminar pa naton sila ukon indi gani ginasikway gid.
Apang may yara sang isa ka lugar nga sa baylo nga malain ang pagtulok, ginasimba pa nila ini kag ginapatihan nga may yara sang gahum.
Ini amo si Topi Amma, ang ginbansagan nga misteryoso nga ‘Hat Mother’ sang Tiruvannamalai, isa ka Hindu pilgrimage city sa Tamil Nadu.
Si Amma ang ginakabig nga kontrobersiyal nga religious nga pigura bangud kun para sa iban, isa lamang ini nga babaye nga nadula sa iya husto nga paminsaron, apang para sa iban, ginakabig nila siya nga ‘siddha’, buot silingon, isa ka enlightened being nga nalab-ot na ang ginatawag nga perfection.
Sa mata sang iban, ginakabig nila nga balaan kag napun-an sang madalom nga kahulugan ang mga hulag ni Amma.
Mangin ang mga tinaga nga nagakawas sa iya mga bibig ang musika para sa mga tawo nga nagapati nga gamhanan siya.
Sa pagkamatuod, mangin ang baso nga ginaimnan ni Topi Amma sang tubig ang ginapulot pa sang mga tawo nga nagapati sa iya.
Sa pihak sini, bangud sa iya maathag nga mental disability, si Topi Amma ang wala gid sang labot sa iya mga deboto kag wala gid nakahangop nga siya gali ang ginasimba bilang perpekto nga tinuga nga may tumalagsahon nga gahum.
