KORONADAL CITY – Nagpaathag ang barangay Kagawad nga ginbansagan “ayuda collector” matapos nga maglapta ang video sang pag-istoryahanay nila sang isa ka 4ps beneficiary nga nakabaton man sang P10,000 nga ayuda gikan sa provincial government sang Sultan Kudarat.
Suno kay Barangay Kagawad Noel Garovillo sang Barangay Langgal, Senator Ninoy Aquino (SNA), Sultan Kudarat indi kwarta halin sa 4Ps ang ginaistoryahan nila sang 4Ps beneficiary nga si Ginang Marilou Ebangeles kundi ang angot sa tag-10,000 nga ayuda nga ginhatag sang provincial government para sa mga person’s in crisis.
Suno kay Kagawad Garovillo, ginpakigbato niya si Ginang Marilou kag ang bata sini nga malakip sa listahan sang dapat nga makabaton sang ayud apisar nga 4Ps beneficiary na sila bangud nakit-an niya ang sitwasyon nga pwerte ka pigado.
Gin-athag pa ni Kagawad Garovillo nga nahisgutan nila sa barangay nga ang kada indibidwal nga makabaton sang P10,000 nga ayudad anng magahatag sang P4,000 agud mahatag sa iban pa nga nagapamigado para madamo ang mabuligan.
Apang, pagabuhinan pa ang P4,000 nga ihatag sang mga ini sang P300 para igabakal sang bangko, P300 para sa ticket sang ila nga palaabuton nga fiesta kag 50 para sa certification sa barangay.
Wala suno pa naintindihan ni Ginang Marilou ang sitwasyon apisar nga napaathag na sa iya.
Wala man naga-ekspektar si Kagawad nga e-record ni Ginang Marilou ang ila nga pag-istoryahanay sang nagpadulong si Kagawad agud nga kuhaon ang P4,000.
Dugang pa nga paathag ni Kagawad nga wala suno pa siya sang intensiyon nga malain kundi nahisgutan sang barangay nga kuhaan ang nabaton nga ayuda sang mga ini para mapakigbahin man sa iban.
Sa karon, nagapanawagan ini sa publiko nga indi siya pag-husgaran bangud maayo suno pa nag tinutuyo sang ila nga ginhimo.
