KORONADAL CITY – Nagnubo sang halos 3,000 ka mga estudyante ang numero sang kasamtangan nga naka enroll sa Koronadal National Comprehensive High School (KNCHS) para sa School year 2023-2024.
Ini ang nangin pahayag ni Mr. Valentin Dignadice, Principal sang KNCHS sa interview sang Bombo Radyo Koronadal.
Suno kay Dignadice, kasamtangan nga ara sa halos 11,000 ka mga estudante ang naka enroll para sa School year 2024-2025 sa diin mas manubo sang sa 14,000 sa School year 2023-2024 ukon sang naglabay nga tuig.
Ginpahayag man sini nga indi lang sang KNCHS kundi sa pila man ka mga secondary Schools sa bilog nga Koronadal.
Dugang pa sini, mahimo suno pa nga madugangan ang mga numero sang mga nagpa-enroll sa KNCHS bangud sa mga late enrollees nga padayon nga naga parehistro.
Ginpaklaro man sini nga tubtub wala pa nakapaguwa sang kamanduan ang DepEd Central office angut sang deadline sang enrollment, padayon nga magabaton ang mga ini sang mga magaparehistro sa subong nga tuig.
Nangin malinong naman ang kabug-usan nga una nga adlaw sang klase sa Koronadal National Comprehensive High School (KNCHS).
