Ano ang imo nga plano kun makalab-ot na ikaw sa retirement age?
Posible nga mag-enjoy ka na lang sa travels; mangin plantita kag mangin masako sa farm; ukon kun may pamilya ka na, mahimo nga mangin hobby mo na ang pag-atipan sa imo nga mga apo.
Apang sa Japan, pinasahi gid ang tatlo ka Lolo nga ginbansagan nga “G3S” bangud sa ila edad nga halos malapit na lang magpa-alam sa kalibutan, nasarangan pa nila nga mag-team up kag magpangawat sa mga balay!
Ini amo sanday Hideo Umino, 88, Hidemi Matsuda, 70, kag Kenichi Watanabe, 69, nga ginpahayag nga lunsay mga ex-convict.
Bangud nga ulupdanay sila anay sa presuhan, ginapahayag nga nagplano sila nga padayunon ang paghimo sang krimen apisar nakaguwa na sila kag apisar sang ila edad nga nagapalanakit na ang tuhod kag likod.
Gin-akusaran ang tatlo nga amo ang nagsulod sa isa ka balay sa Sapporo nga isa ka syudad sa Hokkaido sang Mayo kun sa diin ginkawat ang tatlo ka whiskey kag pagkasunod nga bulan, ginransak pa gid ang isa ka balay kag ginpangtaban ang mga alahas balor P374,000.
Gina-imbestigaran man sang pulis ang ila posible nga kahilabtanan sa 10 ka iban pa gid nga insidente sang pagpangawat sa Sapporo kag sa Ebetsu.//Nagaguwa sa inisyal nga imbestigasyon sang otoridad nga planado man ang tanan bangud si Lolo Hideo ang assigned sa pagsulod sa balay; si Lolo Hidemi ang getaway driver; kag si Lolo Kenichi ang magabaligya sang ila kinawatan.
Base sa pag-interogar sa ila sang kapulisan, gin-ako sang mga tigulang nga ginhimo nila ang krimen agud nga may yara man sila sang palangabuhian.
