KORONADAL CITY – Padayon nga ginabulong sa karon ang mag-iloy nga biktima sang pagpangluthang sa Purok Sampaguita, Barangay Buenaflor, Tacurong city.
Ginkilala sang kapulisan ang mga biktima nga sanday Viola Abarredo, 64 anyos, may bana kag bata sini nga si Jenston Abarredo, 36 anyos nga lunsay mga residente sang Purok Mainuswagon, Buenaflor, sang nasambit nga siyudad.
Suno sa mga himata sang biktima, sakay ang mga ini sang tricycle gikan sa ila himata sa Barangay Bilumen, Lambayong matapos nga magtambong sa isa ka okasyon kag papuli na sang natabo ang insidente.
Samtang paliko na ang mga ini sa ila Purok hinali na lamang may nag-overtake sa ila kag ginhana nga sumbagon ang biktima nga si Jeston apang ginsaway ini.
Bangud nga wala malab-ot sa pagsumg ang biktima, gintiro ini sang isa pa ka suspek nga nagaangkas sa nagasunod man nga motorsiklo.
Bangud sa natabo, nag-angkon sang tama sang bala sa nawong si Jeston samtang sa ulo naman ang nanay sini nga si Viola.
Nahibaluan nga apat ka kalalakihan nga sakay sang XRM kag Raider ang mga suspek.
Sa karon, ginatun-an ang anggulo nga pagpangholdap ukon personal grudge ang rason sa pagpaluthang sa mga biktima.
Nagapadayon man ang imbestisgasyon sang kapulisan sa natabo agud makilala ang mga suspek.
