Mahilig ka man bala mag-kolekta sang mga monyeka?
Tubtob sa diin ka bala dal-on kag ano ang mga kaya mo himuon sa pagka-mahuyugon sa monyeka?
Isa ka 23 anyos nga babaye sa Fall River, Massachusetts ang wala lamang nagakolekta sang monyeka kundi iya man ginapalangga kag GINPAKASLAN PA SINI ANG ISA SA IYA ALAGA NGA ZOMBIE DOLL.
Suno kay Felicity Ann Kadlec-Rossi, bata pa lamang siya, napukaw na ang iya interes sa mga monyeka rason nga samtang nagadako, ginsuguran sini ang magkolekta sang indi lamang basta ordinary nga monyeka kundi mga ‘ZOMBIE DOLLS.’
13 anyos siya sang gin-regaluhan sang iya amay sang monyeka kag suno kay Felicity, 16 anyos siya sang nagsugod nga magpalangga sang zombie doll.
Naglab-ot sa $500 ukon P25,000 ang naggastos ni Felicity sa pagpakasal sa iya alaga nga monyeka nga gintambungan sang walo pa sini ka mga zombie dolls, pila ka mga abyan kag mga himata.
Mahibaluan nga si Felicity ang nakilala man matapos nga ginbida ang iya istorya sadtong tuig 2016 sa adult zombie fiction nga libro nga may tig-ulo nga “Zombieblood.”
