KORONADAL CITY – Isa ka political desisyon ang ginhimo ni Vice President Sara Dueterte sa pagbiya bilang cabinet secretary ni Pangulong Ferdinand Marcos Jr. kadungan sang pagkabungkag sang UniTeam.
Ini ang panan-awan ni Koronadal City Mayor Eliordo Ogena sang ginkuhaan sang reaksiyon angot sa pagresign ni Vice President Duterte.
Suno kay Ogena, sa pagkadula sang UniTeam, may matabo nga coalition of parties and groups bangud isa ini ka deklarasyon nga may legal separation na sanday Marcos kag Duterte.
Bangud sini, mangin hilway na ang bise presidente sa pagpaguwa sang iya mga disgusto sa mga programa nga ginapatuman sang gobyerno.
Nagapati man ang alkalde nga ang mga ginpaguwa nga pahayag ni anay President Duterte kag mga utod ni Vice President Sara ang gin-istoryahan sang pamilya kag aware man ang opisyal angot diri.
Maathag nga ini isa na ka positioning para sa pagpapili niya bilang presidente sa madason nga presidential elections.
Gani ginalauman na ang nasambit nga tikang sang bise presidente bangud sa mga madamo na nga natabo sa tunga nila ni Marcos.
