Nagsaka na sa 19 ang gin-report nga napatay sang ginapatigayon ang Hajj pilgrimage sa Saudi Arabia nga isa sa pinakadaku nga religious gatherings sa kalibutan.
Suno sa foreign ministry sang Jordan, 14 ka Jordanian pilgrims ang nalakip sa napatay bangud sa sunstroke bangud sa sobra ka taas nga temperature. 17 man ka mga tawo ang na-report nga missing.
Sa separado nga statement, ginkumpirma naman sang Iranian Red Crescent nga lima ka Iranians ang napatay sa Mecca kag Medina kadungan sang Hajj.
Ginahulat ang mangin official statement sang Saudi Arabia kasunod sini nga insidente.
Sa bahin ni Foreign Affairs Undersecretary Eduardo De Vega, ginkumpirma nga wala sang Pilipino nga nalakip sa nagsuprer sang stroke kadungan sang event.
Ang hajj ang isa sa lima ka pillars sang Islam kun sa diin kalabanan sa ritwal ang ginahimo sa guwa, nagatiniil, kag mabudlay gid ilabi na para sa mga may edad na.
Ginapahayag nga masobra 40 degrees Celsius ang temperatura kadungan sang annual pilgrimage.
Sang nagligad nga tuig sa amo man nga event, ginapahayag nga 240 ka tawo nga kalabanan halin sa Indonesia ang napatay man suno sa figures sang nagkalain-lain nga mga pungsod apang wala sang partikular nga rason nga nahatag.
