Nahatagan sang bag-o nga kabuhi ang conjoined twins halin sa Panabo, Davao del Norte matapos nga napaidalom sa madinalag-on nga operasyon sa bulig sang Kingdom of Saudi Arabia.
Ini nga kapid amo sanday Akhizah kag Ayeesha nga naga-edad pa lamang sang isa ka tuig.
Ang Saudi amo ang nag-asikaso para sa surgery, treatment period, kag pati na sa gasto sang pamilya sang kapid samtang yara sila sa luwas sang pungsod.
Sila man ang ikaduha nga set sang Filipino twins nga nahatagan sang Kingdom sang amo nga sahi sang surgical separation.
Suno kay Saudi Ambassador to the Philippines Hisham S.A. Alqahtani, ini nga humanitarian work ang isa sa nalab-ot sang Kingdom sa patag sang pag-separar sang conjoined twins kag paghatag sang outstanding medical care kun sa diin makabig na nga pioneer ang Saudi.
Lima tubtub pito ka oras nga surgical procedure ang gin-agyan sang kapid kun sa diin 23 ka consultant doctors, specialists, nursing kag technical staff ang nagbuligay. Nalakip man sa five-stage procedure amo ang organ restoration.
Tuman naman ang pasalamat sang iloy nga nakit-an nga naseparar na ang lawas sang iya mga bata, naga-practice na ang mga ini sa paglakat, kag natuman na ang handum sang pamilya nga makapangabuhi sang normal.
