KORONADAL CITY – Pormal na nga ginpasakaan sang kaso sang Department of Social Welfare and Development ukon DSWD XI sa Office of the Ombudsman sa Davao Region ang isa ka Kapitana nga natukiban nga nagkuha sang ayuda sang isa ka buntis.
Ang nasambit nga kaso ang may kaangtanan sa reklamo sang isa ka buntis nga si Anne Villarin nga benepisyaryo sang P10,000 nga ayuda.
Madumduman nga nangin mainite nga issue ang “Ayuda Scam” matapos nag-viral ang video ni Anne Villarin kun diin nagahilibion ini samtang ginapakita ang P1,500 nga kantidad nga iya nabaton halin sa P10,000 nga ayuda.
Matapos nga ang pag-viral sang video sini, personal nga gin-uli sang Barangay Kapitan nga si Corona Mariscal ang P8,500 nga kulang gikan sa P1,500 lamang nga ayuda nga nabaton sang buntis sa Brgy. Sinawilan, Matan-ao, Davao Del Sur.
Bangud sa natabo kaso nga administratibo kag criminal case ang ginpasaka sang DSWD kaupod ang biktima sa nasambit nga opisyal.
Kalakip man sa ginpasakaan sang kaso ang Brgy. Kagawad nga nalamita man sa ayuda scam.
Kaangot sini, ginaawhag sang DSWD ang tanan nga nagabaton sang ayudad nga magreklamo kun may kasubong sini nga insidente.
