Isa na lamang ka damgo nga mataban sang isa ka kawatan ang mga malahalon nga gamit nga iya ginpangabudlayan nga kawaton sa isa ka balay matapos nakatulog tubtob ginpukaw kag gindakop sang kapulisan.
Suno sa report, ginsulod sang kawatan ang isa ka balay nga ginapanag-iyahan sang doctor sa Lucknow, Uttar Pradesh sa India.
Dugang pa diri, sang nakuha na tanan sang kawatan ang mga gamit nga iya pagakawaton, ginpaandar sini ang aircon sang balay kag didto natulogan sang mahamu-ok.
Nadiskubrehan man nga naka-inom sang makalahubog nga ilimnon ang suspek.
Samtang, natalupangdan naman sang kaingod balay nga bukas ang gate rason nga nagsuspetsa ini kag nagtawag sa tag-iya kag kapulisan.
Sa pagresponde sang mga otoridad, naabtan sang mga ini nga nagakatulog pa sa salog ang suspek kag hawid pa ang ginkawatan nga cellphone.
Gilayon naman ini gin-aresto kag ginpasakaan sang nakaigo nga panumbungon.
