Indi matumba ang panindugan sang Philippine Navy nga may kinamatarong sila nga ipabilinang daan na nga BRP Sierra Madre (LT-57) nga nahamtang sa Ayungin Shoal sa West Philippine Sea (WPS).
Suno kay Philippine Navy spokesperson for the West Philippine Sea Commodore Roy Trinidad, himuon sang ila puwersa ang tanan para nga makay-o ang ginatumod nga World War II-era tank landing ship sang Pilipinas bisan ano pa ang hambalon sang China.
Nahibaluan nga napwesto na ang BRP Sierra Madre sa Ayungin Shoal halin pa sadtong 1999. Ginabug-usan ang crew sang barko sang dinosena nga marines kag sailors sa diin nangin simbolo na ini sang soberenya sang Pilipinas sa West Philippine Sea.
Sa pihak sini, gina-demand sang China ang pagkakas sa BRP Sierra Madre sa ila ginatawag nga Ren’ai Jiao.
Sang nagligad nga adlaw, ginpaguwa sang Armed Forces of the Philippines (AFP) ang isa ka video nga nagapakita sang Chinese sa magagmay nga sakayan nga gina-snatch ukon ginaagaw ang mga supplies nga gin-airdrop sang AFP sa tropa sang mga Pilipino sa BRP Sierra Madre. Ginpahayag man sang AFP nga nag-usar ang mga Chinese sang delikado nga pagmaniobra matapos magpalapit ang ila sakayan sa mga Pinoy.
Sang Biernes, gin-report ni Philippine Coast Guard (PCG) spokesperson for WPS Commodore Jay Tarriela nga hungod nga ginbungguan sang China Coast Guard vessels ang Philippine Navy rigid hull inflatable boat sa pihak sang pahibalo sa mga Chinese nga isa lang ini ka humanitarian mission nga i-evacuate ang myembro sang AFP nga yara sa BRP Sierra Madre bangod nagamasakit kag nagakinahanglan sang medical attention.
Suno kay Trinidad, may tatlo ka mga crewmen nga nagmasakit apang naka-recover naman ang mga ini.
Para naman sa ila parte, ginpahayag sang PCG nga nagakooperar sila sa AFP sa paghimo sang mga pamaagi para masuportaran ang mga tropa sang Pinoy nga sakay sang BRP Sierra Madre.
Sa tunga sang mga pagpanghangkat, ginsiling ni Tarriela nga padayon nila nga depensahan ang soberenya sang Pilipinas para sa masunod nga mga henerasyon.
Wala pa sang pahayag ang Chinese Embassy sa Manila angut sa ini nga topiko.
