KORONADAL CITY – Nagdihon na ang kapulisan sang Special Investigation Task Group (SITG) para sa gilayon nga pagresolbar sa pagmasaker sa apat ka magpalakaisa sa Purok 5, Luayan, Barangay Dumadalig, Tantangan, South Cotabato.
Ini ang ginpahayag ni Police Capt. Annaliza Domingo, tigpamaba sang South Cotabato Police Provincial Office sa interview sang Bombo Radyo Koronadal.
Suno kay Domingo may persons of interest na sila nga ginasundan sa krimen sandig sa testimonya sang lone survivor kag pamilya mismo sang mga biktima.
Sa pagkamatuod, nagpatigayon na sila sang case conference kun diin gin-istoryahan ang mga natipon nga ebedensiya agud matumod ang identity sang suspek kag ang motibo sang pagpangluthang.
Kadungan sini, ginpasiguro man sang kapulisan nga pahugtan ang pagbantay sa nagaisahanon nga survivor nga ginabulong pa karon sa hospital agud maluwas ini sa kapahamakan.
Madumduman nga apat ang ginbawian sang buhay sa nagluntad nga pagpangluthang sang suspek gamit ang Armalite rifle samtang nagasinadya ang magpalakaisa sa puluy-an sang pamilya Yuarata.
Kalakip sa mga napatay magpakaisa nga sanday Jerry Tabamo Yuarata nga amo ang target sang gunman; Argie Villas Villorente, Marcelo Bernachea Combiz kag isa ka Ronald Orin Vallespin.
Sa subong, padayon nga ginasinggitan sang pamilya ang hustisya para sa mga napatay nga biktima.
