KORONADAL CITY – Nakabalik na ang 4 sa lima ka mga preso nga nakapalagyo sa Parang MPS lock-up cell sang Parang MPS, Parang, Maguindanao del Norte.
Ini ang ginkumpirmar ni Police Lt.Col. Christopher Cabugwang, hepe sang Parang Municipal Police Station sa interview sang Bombo Radyo Koronadal.
Suno kay Cabugwang ang mga preso nga nadakpan na kag nabalik sa presuhan amo sanday Sadam Ibrahim Diamla, nasa legal na edad, residente sang Brgy.Pob.2, Parang, Maguindanao Del Norte; Allan Taup Gumaga,residente sang Brgy. Sapad, Matanog Maguindanao del Norte; Ruben Gulang Dadigan Jr., legal age kag residente sang Brgy. Sarmiento Parang Maguindano del Norte kag Alex Burnales Sanday, legal age nga residente naman sang Brgy. Nituan Parang Maguindanao del Norte.
Samtang, ang padayon nga ginapangita apang may surrender feeler na amo si Panginima Alo alyas Badrudin Ali Taher, legal age, residente sang Brgy. Ruminimbang, Barira Maguindanao del Norte.
Naguwa sa imbestigasyon sang kapulisan nga nadiskubrehan ang pagpalagyo sang mga ini sang 1:59 Sabado sang kaagahon sang magkambyo sang pulis nga nagabantay.
Nakit-an suno pa sang incoming duty officer nga bukas ang pwertahan sang selda rason nga ginlantaw sini ang CCTV camera kag nakit-an nga nag-iskapo ang 5 ala 1:20 tubtob 1:59 sang kaagahon paagi sa pag-guba sang lock sang presuhan gamit ang lagari nga improvised.
Kaangot sini gilayon nga nagkasa sang hot pursuit kag pagkahapon sang Sabado nadakpan ang apat kag nabalik na sa presuhan samtang padayon nga ginapangita ang isa pa.
Ginbutang naman sa restricted custody ang mga pulis nga naka duty sang oras nga nakapalagyo ang lima ka detainee para sa ginpatigayon nga imbestigasyon.
