KORONADAL CITY – Indi pa mapasiguro sang Department of Energy nga magpadayon ang kada semana nga rollback ukon pagnubo sang presyo sang mga produkto nga petrolyo.
Ini ang ginpahayag ni Ms. Adela Romero, ang Assitant Director sang DOE-Oil Industry Management Bureau sa eksklusibo nga interview sang Bombo Radyo Koronadal.
Suno kay Assitant Director Romero, nagadepende ang presyuhanay sang mga produkto nga petrolyo sa pungsod sa hulag sang presyo sa International Market.
Ini bangud klaro naman nga importer sang petroleum products ang Pilipinas.
Buot silingon, nagasalig ang pungsod sa pagbakal sa Oil products sa luwas.
Magluwas sini, sa tion nga may “devaluation” sa peso ukon magsaka ang balur sang dolyar, mas mabug-at sa pungsod ang pag-import bangud nagakinahanglan ini sang mas dako nga kantidad.
Gani ang nagakatabo magapaimplementar naman sang pagsaka sa presyo sang gatong sa Pilipinas.
Apang, suno sa opisyal, sa pihak sini tanan, wala nagapabaya ang gobyerno sa ginahimo nga monitoring sa ground kag paghatag naman sang ayuda ukon subsidiya sa mga vulnerable sector kasubong sang transport group, mga mangunguma, mangingisda kag iban pa nga tuman nga apektado sini.
