KORONADAL CITY-Nagapadayon sa subong ang imbestigasyon sang mga otoridad sa nagluntad nga pagmasaker sang mga armado sa isa ka pamilya sa banwa sang Lebak, Sultan Kudarat nga nagresulta sa pagkapatay sang 4 ka magkapamilya kag pagkapilas sang isa pa.
Ginkilala ni PMAJ Joel Martinez, hepe sang Lebak Municipal Police Station ang mga napatay nga sanday Jimmy Lapat Capiceño Sr. 59 anyos kag asawa sini nga Aida Kamaman Capiceño, 59 anyos kag apo sang mga ini nga sanday Jimmy Jr., 12-anyos kag Esmaira, nga yara pa lamang sa 9 anyos nga lunsay mga residente sang Center 1, Barangay Taguisa sa nasambit nga banwa.
Samtang pilason naman si Jay-ar Kamaman Capiceño, 28 anyos nga naigo sa hita kag gindala naman sa Sultan Kudarat District Hospital.
Samtang ang una nga nareport nga 10 anyos nga bata nga si Jaymar Kamaman Capiceño ang na-rescue na sang mga otoridad kag yara na sa luwas nga sitwasyon.
Suno kay Martinez, nagluntad ang wala untat nga pagpangluthang sa magkapasamilya sa Salunganan, Sitio Tuka, Barangay Datu Karon, Lebak, Sultan Kudarat nga sakop sang 104th Base Command sang MILF Community.
Ginkilala ang mga suspek nga sanday Den Den Rakman Saludin, Dick Datumanong kag isa pa ka wala nakilal-an nga mga kaupod sini nga lunsay mga katapo suno pa sang 104th MILF Base Command.
Nag-guwa sa imbestigasyon sang mga otoridad nga samtang naga pahuway sa payag-payag ang magkapamilya makaligad ang pagpnguha sang alimango, nag-abot ang mga armado kun diin gin-agda ang mga ini ni Manong Jimmy Capiceño Sr. agud magpangape.
Matapos mangape, didto na suno pa ginpangluthang isa-isa sang mga ini ang mga biktima usar ang M16 armalite rifles.
Sa subong indi pa matumod sang mga otoridad kung anu ang motibo sang krimen samtang nagapadayon naman ang ginapatigayon nga hot pursuit operation sang mga otoridad batok sa mga nakapalagyo nga mga suspek.
