KORONADAL CITY – Nagaapela ang pila ka mga tricycle drivers sa siyudad sang Koronadal nga pasakaan ang pamasahe agud nga makatibawas man sila kag masustineran ang tagsa nila ka pamilya kasunod sang asud-asod nga pagsaka sang presyo sang produkto nga petrolyo.
Ini ang nangin pahayag sang grupo sang mga tricycle drivers sa interview sang Bombo Radyo Koronadal.
Suno sa ila bangud sa pagsaka sang presyo sang petrolyo sa kada semana ,nangin mabug-at pagid ang ila nga pagpaningkamot bangud halos maubos na sa gasolina ang ila nga kinitaan sa kada adlaw.
Gindugang pa sang mga ini nga halos lugi na suno pa sila bangud masami nga dyutay lang ang ila nga kinitaan kag kuhaan pa ini sang arkila sang motor, pagkaun ,gasolina kag gatas sang ila nga kabataan.
Bangud man sa asud-asod nga pagsaka sang presyo sang gatong, nagahingyo man sila sang dugang nga pamasahe bangud kun indi ini mapahanugutan makaantos sila kag ang ila pamilya.
Nahibaluan nga sa madason nga semana ginalauman na ang pagsaka pa sang presyo sang krudo, gasolina kag kerosene.
