KORONADAL CITY – Apektado ang mga Overseas Filipino Workers (OFW) sa lockdown sa Hong Kong matapos ang hinali nga pagtaas sang COVID-19 cases sa pungsod.
Ini ang ginpakigbahin sa Bombo Radyo Koronadal ni Bombo International Correspondent Rashelle Sustento.
Suno kay Sustento, tuman ka makaloluy ang batyagon ang sitwasyon sang mga kaupdanan sini nga ginpangterminate sang ila amo bangud sa pagpositibo sa COVID-19.
Una diri, naka-work from home set-up ang tanan nga mga pumuluyo sa Hong Kong matapos magdeklarar sang nationwide lockdown ang gobyerno tuga sang surge sang COVID-19.
May mga OFW’s suno diri nga nagpositibo sa Covid kag gin-terminate sang ila employer sa kakulba nga malatnan sila sang nasambit nga balatian apang masuwerte man kay madamo sang mga Non-Government Organizations (NGO’s) ang nagatatap sa ila.
May ara man suno pa diri nga naga pala-uli nalang sa pungsod tungod nadulaan sang trabaho sa pagsarado sang pila ka establishments apang, may ara man sang naga ”cross-country” nalang ukon nagapangita sang trabaho sa iban nga pungsod.
