KORONADAL CITY – Wala pa gin-abisohan sang LGU-Lake Sebu nga magbalik sa ila nga panimalay ang masobra 400 ka mga pamilya nga ginpabakwit sa Lake Sebu, South Cotabato bangud sa malapnagon nga pagbaha.
Ini ang ginpahayag ni Lake Sebu Mayor Floro Gandam sa interview sang Bombo Radyo Koronadal.
Suno sa alkalde, bangud wala pa sila sang kasiguraduhan nga mangin maayo ang dalagan sang panahon sa Lake Sebu, wala anay nila gintugutan nga magbalik ang mga bakwit sa pila ka mga barangay sa ila nga banwa tungod tuman pa ini ka delikado para sa ila.
Gindugang pa sang alkalde, magasapol pa ang iya nga talatapan kaupod man ang MDRRMO kag mga Departamento agud diskusyunan ang madason nga tikang nga ila paga himoon sa ila nga lugar.
Naga laum naman ini nga makabalik sa pinakamadali nga tion ang mga nagbakwit nga mga residente sa ila nga puluy-an apang naga depende pa sa assessment sang mga departamento ang desisyon kun mahimo na sila makabalik.
Wala pa man nagpaguwa ang LGU Lake Sebu kun pila ang kabug-usan nga damyos nga ginbilin sang kalamidad.
