KORONADAL CITY – Ginpahugtan pa subong sang mga otoridad sang seguridad sa mga terminal sa South Central Mindanao matapos ang nagluntad nga pagpasigabong sang isa ka unit sang Mindanao Star Bus sa siyudad sang Cotabato.
Suno kay Lt. Col Jude del Carmen, tigpamaba sang Cotabato City PNP, isa sa ginalantaw nga anggulo sa panibag-o nga pagsigabong ang pagpanghadlok lamang kag extortion.
Ini makaligad nga may isa ka unit sang bus sang nagligad nga gab-i nga ginpasigabungan samtang yara sa parking area sang terminal sa Don Rufino Alonzo Street, Poblacion 5 Cotabato City.
Wala naman naubos sunog ang bus sa pagsigabong sa likod nga bahin sini.
Naghalin sa Davao City ang bus kag wala pa is aka oras nga ginparada sa parking area sang terminal sang hinali nga nagsigabong.
Maswerte naman nga wala sang may napilasan sa insidente apang nagdulot naman ini sang kahadlok sa mga residente sa nasambit nga lugar.
Sa subong, ginahibalo pa ang signature sang nasambit nga bomba.
Apang, dako ang pagpati sang PNP nga may kaangtanan ini sa nagluntad nga pagpasigabong kag pagsunog sang bus sa Cotabato province sang nagliligad nga mga binulan.
Kadungan sini, nagapanawagan ang mga opisyal nga padayon nga mangin alerto agud nga indi na masulit pa ang pagpasigabong.
