KORONADAL CITY – Masubo nga ginpakigbahin sang isa ka 25-anyos nga Ukrainian national ang kasamtangan nga sitwasyon sa karon sang pamilya sini nga isa ka semana na nga nagapanago sa basement sang ila nga puluy-an matapos nga ginsuguran sang Russia ang pagsalakay sa ila nga pungsod.
Sa eksklusibo nga interbyu sang Bombo Radyo Koronadal kay Alyesha Shelest, residente sang Kharkiv City, nagamuha kag nahadlok siya para sa iya pamilya nga halos indi na makahulag bangud sa padayon nga pagpamomba kag pag-atake sang Russian forces.
Suno pa kay Alyesha, madami man sila sang mga himata sa Russia nga wala nagasuporta sa ginhimo ni President Vlademir Putin kag nagpatigayon sang protesta apang pilit nga ginpunggan sang mga otoridad.
Halos ghost town na sa karon ang ila nga lugar kag padayon nga nagapanago ang mga sibilyan magluwas sa mga Ukrainian forces nga nakahanda nga ipakigbato ang ila nga pungsod.
Sa subong, nagapanawagan ini kag nagalaum nga mauntat na ang giyera agud nga makab-ot nila ang kalinong kag indi na madugangan pa ang mga napatay.
Nahibaluan nga isa man ang utod sini nga nalukpan sang missile bomb sang Russian troops.
Sa subong, mabudlay ang sitwasyon sa Ukraine mangin ang komunikasyon.
