KORONADAL CITY – Ginpahugtan pa sang AFP kag PNP joint forces ang hot pursuit operation batuk sa grupo ni MILF-BIAF commander Jordan nga responsable sa pagpang-ambush-patay sa 9 ka mga indibidwal nga lunsay mga MILF-BIAF members man sa Sitio Dam, Barangay Kalumamis, Guindulungan, Maguindanao.
Ini makaligad nga ginmandu ni PRO-BAR Regional Director Brigadier General Arthur Cabalona ang gilayon nga pagdakop kay Kumander Jordan Mamanalintang, bata sini nga si Morsid alyas Ngelong kag mga kaupdanan sini.
Ang nasambit nga grupo ang responsable sa pag-pang-ambush-patay sa grupo ni Kumander Peges Mamasainged alyas Black Magic”, Inner Guard sang Base Command sang MILF-BIAF kag mga bata sini nga sanday Sadam Mamasainged, Sadre Mamasainged, Johari Mamasainged, Kamaro Mamasainged, “alyasTani” kag tatlo ka iban pa.
Pilason man sa insidente ang tatlo ka himata sang mga ini nga sa karon nagapaayo pa sa hospital.
Una diri, ginasubay sang grupo ni Commander Black Magic ang nasambit nga lugar sakay sang duag pula nga Montero kag itom nga Ranger Ford.
Padulong kuntani sa Datu Saudi Ampatuan ang mga biktima para sa isa ka rido settlement ukon kanduli sang hinali sila nga ginluthang sang grupo nanday Commander Jordan nga residente sang nasambit nga lugar kag pakaisa sang mga biktima.
Naguwa man sa imbestigasyon sang mga otoridad nga ang nasambit nga mga pamilya ang anay na nga nagaaway
Kalakip ang Guindulungan MPS, AFP, kag Maguindanao Provincial Mobile Force Company ang kasamtangan nga nagapatigayon sang hot pursuit operation batuk sa mga suspek.
Kaangot sini, hugot naman nga ginakondenar sang pamilya sang nga biktima ang nagluntad nga pagpamatay.
Magluwas sini, naka-full alert status man sa karon ang mga otoridad sa lugar sa posible nga retalliation sang mga himata sang mga biktima sa mga suspek labi na kag padayon man ang pagpatuman sang election gun ban.
