KORONADAL CITY-Nagapadayon sa subong ang imbestigasyon sang mga otoridad sa nagluntad nga pagpanglutahang sa banwa sang Polomolok, South Cotabato nga nagresulta sa pagkapatay sang isa kag ginkapilas namansang 5 ka iban pa.
Ini ang ginkumpirma ni Police Lt. Col. Verlin Pampolina, hepe sang Polomolok Municipal Police Station sa interview sang Bombo Radyo Koronadal. Ginkilala ang napatay nga biktima nga si Allan Kindayo Calamunggi, 46 anyos kag residente sang Barangay Palian, Tupi, South Cotabato samtang pilason naman ang asawa sini nga si Diana Calamunggi, kag mga bata sang mga ini nga naga pangidaron sang 16, 5, 4 kag 6 ka bulan nga lapsag.
Suno sa hepe kag naguwa man sa imbestigasyon nga ginamaneho ni Calamunggi ang tricycle sakay ang pamilya sini sang hinali nga nalang nga gin dikitan sang wala pa makilkal-an nga mga riding-in-tandem suspects sa bahin sang Purok Pinali, Barangay Bentung, Polomolok, South Cotabato kag ginluthang ang biktima.
Nakaangkon sang pilas sa nagkalain-lain nga bahin sang lawas ang biktima nga nagresulta sang pagkadula sang control sini sa tricycle nga kabangdanan sang pagkapilas sang mga miyembro sang pamilya sini. Gintinguha pa nga dalhon sa balay-bululngan ang pilason nga biktima ang nautasan ini sang kabuhi.
Sa subong, ginahibalo pa sang mga otoridad ang report nga suno pa katapo ang napatay nga biktima sang Dawlah Islamiya Nilong group kag luyag na kuntani nga maghalin sa grupo apang indi luyag sang mga kaupdanan sini kabangdanan nga gin-alegar nga ginpatay ini.
