KORONADAL CITY – Tuman nga selos suno pa ang motibo sang isa ka Mister sa pag-masaker sini sa iya pamilya antes pa man nga naghikog sa banwa sang Tupi, South Cotabato.
Ini ang ginpahayag ni Police Col. Nathaniel Villegas, provincial director sang South Cotabato sa interbyu sang Bombo Radyo Koronadal.
Ginkilala ang mga biktima nga sanday Beverlyn Dinal, mga bata sini nga sanday alias Shelton kag alias Peter nga lunsay mga menor de edad samtang ang suspek nga naghikog amo si Allan Dinal, 37 anyos nga lunsay mga residente sang Sitio Glandang, Barangay Kablon, Tupi, South Cotabato.
Suno kay Villegas, nagatrabaho sa General Santos City ang biktima nga si Beverlyn kag bangud sa madugay ini nga wala makapauli rason nga naakig ang mister sini nga si Allan tubtob nga nag-away ang mag-asawa kag naglab-ot sa pagpamuno sang suspek.
Ginlamita pa sang suspek ang duha ka menor de edad nga bata nga lalaki sang mga ini antes naghikog.
Nagluntad ang insidente alas-9:35 Biyernes sang gab-i sa nabukid nga bahin sang nasambit nga lugar kun diin nabatian pa sang mga kaingod sang mga biktima nga nagaaway ang mag-asawa samtang nagahibi ang duha ka mga bata sini.
Pagkaligad sang tunga sa oras naglinong na ang mga ini rason nga ginchekyar ang ila puluy-an kag didto nakita nga duguon nga nagahamyangon na ang mga biktima sa hiligdaan sang mga ini kag wala na sang kabuhi.
Nag-angkon sang pilas sa nagkalain-lain nga bahin sang ila lawas ang mga biktima samtang gindala pa sa hospital ang suspek apang dead on arrival na ini.
Narekober sa Crime Scene ang 2 folded knife nga gingamit sa pagpamuno sa mga biktima kag paghikog sang suspek.
