KORONADAL CITY – Liwat nga ginbisita sang mga himata sang mga biktima sang Maguindanao massacre ang lugar kun diin nagluntad ang makasiligni nga krimen kadungan sang ika-12 ka tuig nga anibersaryo subong nga adlaw.
Ini ang nangin pahayag ni Jhan Chienne Maravilla, bata ni Bombo Ernesto “Bart” Maravilla, nga isa sa mga biktima sang makasiligni nga masaker, sa interbyu sang Bombo Radyo Koronadal.
Suno kay Jhan Chienne, kaupod sang iya iloy kag iban pa nga mga himata ang nagpadulong sa massacre site kun diin nagpatigayon ang mga ini sang paghalad sang misa, bulak, pagsindi sang kandila kag pagpakita sang pagpalangga sa ila mga mahal sa kabuhi.
Apang, limitado lamang ang mga nagpadulong sa site indi kasubong sang nagligad nga tuig nga wala pa sang pandemic.
Sa subong, nagalaum sila nga mga pamilya sang mga biktima sang masaker nga makab-ot na ang bug-os nga hustisya labi pa nga partial pa lamang suno pa ang ila nga nakuha.
Aminado man ini nga tubtob sa karon apisar nga nasentensiyahan na nga mapreso ang kadam-an sa mga suspek nga involbado sa masaker, wala sa gihapon madula ang ila kabalaka sa ila nga seguridad labi na nga may iban nga mga suspek nga nagapabilin nga “at large” samtang ang iban naman na-abswelto sa kaso.
