KORONADAL CITY – Yara na subong sa kustodiya sang Koronadal PNP ang isa ka lalaki makaligad nga nadakpan bangud sa paglabo-patay sini sa kaugalingon nga tiayon sa bahin sang Prk. Lower Libertad, Brgy. Topland sang sini nga siyudad.
Ginkilala ang nasambit nga suspek nga si Alfredo Villaray Jr, 55 anyos, kag residente sang nasambit nga lugar. Sandig sa inisyal nga imbestigasyon sang Koronadal PNP, nagluntad ang insidente pasado alas 9 kagab-i sang ginlabo suno pa sang suspek ang tiayon sini kag biktima nga si Jailyn Lagradante Villaray, 36 anyos.
Nakaangkon ang biktima sang madamo nga mga labo sa iya ulo nga nangin kabangdanan sang iya pagkapatay.
Narekober sa crime scene ang binangon nga gin-usar sa paglabo sa biktima kag isa ka kitchen knife nga ginapatihan nga gin-usar suno pa para man sa pagbuno.
Ginaimbestigaran man sang mga otoridad kun yara sa impluwensiya sang makahulubog nga ilimnon ang suspek sang ginhimo sini ang krimen.
Sa subong kaso nga parricide ang pagaatubangon sini samtang natalana nga i-commit sa South Cotabato Provincial Jail.
Ginalantaw nga motibo sang kapulisan sa pagpanglabo sang suspek sa iya asawa amo ang pagpangimon (selos) kag ang kawad-an sang salig.
